Victor Lindelöf er 22 ára gamall varnarmaður sem spilar með Benfica
Sænski landsliðsmaðurinn Victor Lindelöf hjá Benfica virðist vera á leið til Manchester United. Breska blaðið Mirror greindi frá því að dag að Svíinn hefði tilkynnt vinum sínum að félagaskiptin myndu ganga í gegn í janúar. Talið er að United greiði Benfica 38 milljónir punda fyrir leikmanninn, 5,3 milljarða króna.
Lindelöv er 22 ára gamall varnarmaður sem hefur spilað fyrir Benfica frá árinu 2012. Hann gekk í raðir portúgalska félagsins frá Västerås SK í heimalandi sínu.
Lindelöf braust inn í aðallið Benfica á síðustu leiktíð en þá spilaði hann 25 leiki í það heila. Það sem af er þessu tímabili hefur Lindelöf spilað 21 leik og verið lykilmaður hjá liðinu. Þá hefur hann spilað ellefu landsleiki fyrir Svíþjóð og skorað í þeim eitt mark.
Lendelöf er 187 sentímetrar á hæð og kemur hann væntanlega til með að berjast við Chris Smalling, Phil Jones, Eric Bailly og Marcos Rojo um sæti í byrjunarliði United. Rojo og Jones hafa spilað saman í miðri vörn United í undanförnum leikjum og staðið sig betur en flestir áttu von á. José Mourinho, knattspyrnustjóri United, er þó sagður vilja styrkja vörnina enn frekar.
Búist er við því að nokkrar breytingar verði á leikmannahópi United þegar opnað verður fyrir félagaskipti í janúar. Talið er fullvíst að Morgan Schneiderlin og Memphis Depay verði seldir eða lánaðir og þá er talið að Bastian Schweinsteiger fari til Bandaríkjanna þar sem hans bíða tilboð. Þá er óvissa um framtíð Matteo Darmian, Ashley Young og Marouane Fellaini.