„Ég held að ég hafi sagt í fyrsta viðtalinu mínu þegar ég var 15 ára gamall að draumafélagið væri Barcelona. Auðvitað er það hrikalega spennandi og mig hefur alltaf langað til þess að spila þar,“ segir Aron Pálmarsson, landsliðsmaður í handbolta, í viðtali í Morgunblaðinu í dag.

Aron, sem leikur með Veszprém í Ungverjalandi, er með samningstilboð frá Barcelona en þar að auki hafa Kiel í Þýskalandi og PSG í Frakklandi lýst áhuga á að fá hann í sínar raðir.

Aron segist í viðtalinu vera að velta því fyrir sér hvað hann eigi að gera og hann muni gefa sér góðan tíma til þess, enda ákvörðunin stór. „Þetta er örugglega stærsta ákvörðun sem ég hef tekið,“ segir hann í viðtalinu en Barcelona hefur um árabil verið eitt sterkasta handboltalið heims. Guðjón Valur Sigurðsson lék með liðinu frá 2014 til 2016 þar sem hann varð Spánar- og Evrópumeistari.