Guðmundur Guðmundsson segir skilið við danska handboltalandsliðið
Guðmunudur Þórður Guðmundsson hefur ákveðið að skrifa ekki undir nýjan samning við danska handknattleikssambandið. Hann lætur af störfum fyrir sambandið 1. júlí næsta sumar. Þetta kemur fram á heimasíðu danska sambandsins en danskir fjölmiðlar hafa líka sagt frá.
„Ég hef upplifað spennandi hluti með danska landsliðinu. Ólympíugullið í sumar var það stærsta. En næsta sumar þegar samningurinn klárast hef ég önnur áform um framhaldið,“ er haft eftir Guðmundi. Á dönsku segir hann, „Jeg har andre planer“.
Fram kemur á heimasíðu sambandsins að Guðmundar verði alltaf minnst í danskri íþróttasögu fyrir það afrek að vinna ólympíugulli í Ríó. „Guðmundur er ótrúlega hæfileikaríkur handknattleiksþjálfari og líklega sá eini sem hefur komist tvívegis í úrslit á Ólympíuleikum með tvær þjóðir.“
Eins og fram kom í morgun er Dagur Sigurðsson sagður ætla hætta að þjálfa þýska landsliðið á næsta ári og fara til Japans. Það skyldi þó aldrei verða að Guðmundur Guðmundsson verði arftaki Dags?
