Frank Lampard, markahæsti leikmaður í sögu Chelsea, er hrifinn af knattspyrnuhæfileikum Sveins Arons Guðjohnsen. Sveinn Aron er sem kunnugt er sonur Eiðs Smára Guðjohnsen.

Eiður birti myndband á Instagram-síðu sinni af glæsilegu marki sem Sveinn Aron skoraði fyrir íslenska U19 ára landsliðið á dögunum. Markið kom í leik á móti Lettlandi og bar Ísland sigur úr bítum, 2-0. Sveinn Aron skoraði glæsilegt mark í fyrri hálfleik og kom Íslandi í 1-0. Hann fékk sendingu inn fyrir vörn Letta og skoraði úr mjög þröngu færi utarlega úr vítateignum.

Fjölmargir hafa skrifað athugasemdir við færslu Eiðs og lætur Frank Lampard, góður vinur Eiðs Smára, ekki sitt eftir liggja. „Hann hreyfir sig alveg eins og þú. Gaman að sjá hann standa sig vel,“ segir Lampard. Fleiri taka í sama streng og Lampard og segja að margt í leik Sveins Arons minni á leik Eiðs.

Eiður og Lampard urðu góðir vinir þegar þeir léku saman hjá Chelsea. Sveinn Aron, sem er fæddur árið 1998, er leikmaður Vals en hann gekk í raðir félagsins í sumar frá HK. Hann á átta leiki að baki fyrir U19 ára landsliðið þar sem hann hefur skorað þrjú mörk. Þá lék hann níu leiki með U17 ára landsliðinu.

Færslu Eiðs má sjá hér að neðan: