Ensku félögin Manchester City, Chelsea og Manchester United bera höfuð og herðar yfir önnur félög þegar kemur að eyðslu fjármuna í leikmenn síðustu sex árin. CIES Football Observatory hefur tekið saman heildareyðslu liða úr stærstu fimm deildum Evrópu. Sex stærstu liðin á Englandi eru öll á meðal þeirra fimmtán liða sem mestum peningum hafa eytt í leikmenn frá árinu 2010.

Allt árið um kring eru settar fram vangaveltur í formi frétta um yfirvofandi félagaskipti leikmanna. Aðaltíminn er yfir sumarið en ekki er laust við að sumum stjórunum leiðist þetta tímabil. Þannig sagði Jurgen Klopp, stjóri Liverpool, í sumar að hann gæti ekki beðið eftir að félagaskiptaglugginn lokaði. Hann sagði að menn einblíndu allt of mikið á það frekar en að horfa á hvernig lið tækju framförum með æfingum og leikskipulagi.

Þó að hægt sé að kaupa bestu leikmenn heims fyrir peninga er það ekki ávísun á árangur. Það sannaði Leicester á síðustu leiktíð og Atletico Madrid leiktíðina 2013/2014.

Listinn hér kemur örugglega engum sérstaklega á óvart. Manchester City hefur eytt 130 milljónum punda meira í leikmenn síðustu sex árin en nokkurt annað lið. Dæmi um leikmenn sem liðið hefur keypt undanfarin misseri eru Kevin De Bruyne (55 milljónir punda), Raheem Sterling (44 milljónir punda), Nicolas Otamendi (32 milljónir punda) og Leroy Sane (37 milljónir punda).

Listinn tekur ekki til þeirra fjárhæða sem sömu félög hafa fengið fyrir að selja leikmenn. Hér á síðunni má hins vegar einnig sjá hvaða félög hafa fengið hæstar upphæðir fyrir sölu leikmanna á umræddu sex ára tímabili. En hér eru þau lið sem hafa keypt leikmenn fyrir hæstu upphæðirnar undanfarin sex ár.

Félög sem hafa eytt mestum peningum í leikmenn 2010–2016

Upphæðir eru í milljónum punda.

Félög sem hafa fengið mest fyrir að selja leikmenn 2010–2016