Þjóðverjar sigruðu Norðmenn í framlengingu á Evrópumótinu í handbolta sem fram fer í Póllandi. Leikurinn var æsispennandi og endaði 33-34. Þjóðverjar skoruðu sigurmarkið þegar nokkrar sekúndur voru eftir. Líkt og alþjóð á nú að vita, þjálfar Dagur Sigurðsson þýska liðið.
Þýskir fjölmiðlar eru gríðarlega ánægðir með Dag og sögðu þýskir fjölmiðlar fyrir leikinn:
„Þetta er klárlega lið sem endurspeglar karakter þjálfarans en hver hefði trúað því að svona margir Germanir gætu breyst í kalda og taugasterka Íslendinga.“
Árangurinn hefur vakið mikla hrifningu í Þýskalandi og er ótrúlegur í ljósi þess að um hálfgert varalið Þýskalands er að ræða, en fjölmargir sterkir leikmenn eru frá vegna meiðsla.
Leikurinn var í járnum lengst af en Þjóðverjar höfðu að lokum sigur. Dagur hefur nú sannað sig sem einn besti þjálfari heims.