Sælgætið bragðsterka Victory V, oft nefnt brenni, var, auk nokkurra annarra sælgætistegunda, bannað af íslenskum heilbrigðisyfirvöldum vegna skaðlegra efna. Brenni hafði þá verið selt hér á landi í áratugi. Var þetta viðbragð af fréttaflutningi DV um brenni sem íslenskir unglingar notuðu til að komast í vímu. Brenni innihélt klóróform og eter sem meðal annars er notað til svæfinga. Sömu efni voru í bláum Ópal sem tekin var af markaði skömmu áður. Ísland var ekki eina landið sem bannaði Victory V og var efnasamsetningunni breytt skömmu síðar og innflutningur þá leyfður aftur. Kunnugir menn segja þó að brenni hafi verið mun betra fyrir breytinguna.