David Laut var skotinn til bana á heimili sínu í ágúst 2009
Dómstóll í Bandaríkjunum hefur dæmt Jane Laut, 59 ára konu, í 50 ára fangelsi fyrir morð á eiginmanni sínum, kúluvarparanum David Laut. Laut þessi vann til bronsverðlauna í kúluvarpi á Ólympíuleikunum í Los Angeles árið 1984.
Laut var skotinn til bana á heimili sínu þann 27. ágúst 2009. Jane sagði við lögreglu að hún hefði skotið eiginmann sinn í sjálfsvörn, en að sögn hennar hafði hann beitt hana ofbeldi um margra ára skeið.
Í ársbyrjun 2015 komust saksóknarar og verjendur Jane að samkomulagi þess efnis að hún fengi sex ára fangelsisdóm ef hún játaði sök í málinu. Því tilboði hafnaði hún hins vegar og fór því málið sína leið í réttarkerfinu. Hún var sakfelld í lok mars og í dag var refsing í málinu kveðin upp.
Jane hlaut tvo 25 ára fangelsisdóma sem hún þarf að afplána hvor í sínu lagi. Annan dóminn hlaut hún fyrir morðið en hinn fyrir að hafa beitt skotvopni við morðið.
Þau Jane og David voru gift í 29 ár. Við réttarhöldin kom fram að David hafði ítrekað beitt hana ofbeldi. Hann hefði bæði beitt hana barsmíðum og nauðgað henni. Kvöldið örlagaríka er hann sagður hafa ráðist á Jane og ógnað henni og tíu ára syni þeirra með skammbyssu. Til átaka hafi komið milli hennar og Davids sem endaði með því að hún náði byssunni og skaut eiginmann sinn til bana.
Saksóknarar bentu hins vegar á að David hafði verið skotið sex sinnum og byssuna, sem notuð var við morðið, hefði þurft að hlaða eftir hvert skot. Það benti til einbeitts brotavilja og að ekki hafi verið um hreina og klára sjálfsvörn að ræða. Verjendur Jane segja að dómnum verði áfrýjað.