Karlmaður í Minnesota í Bandaríkjunum, Joseph Thoresen, og ónefnd kærasta hans hafa verið ákærð fyrir hrottalegt morð. Þau eru grunuð um að hafa orðið tvítugum manni að bana, en kærasta Thoresen hafði sakað manninn um að hafa nauðgað sér.

Maðurinn sem var myrtur heitir David Haiman og í frétt NBC News kemur fram að allt hafi ætlað um koll að keyra þegar David heimsótti Joseph og kærustu hans. Öll eru þau sögð hafa þekkst en þegar David kom að heimili mannsins réðst konan, sem sakaði hann um nauðgun, á hann og nefbraut hann.

Haiman er sagður hafa viðurkennt að hafa nauðgað konunni og féllst hann á að hann ætti skilið refsingu. Fór svo að Joseph og kærasta hans bundu hann og börðu illa. Í kjölfarið eru þremenningarnir sagðir hafa farið út af heimilinu, stigið upp í bíl og ekið af stað meðan þau reyktu marijúana og neyttu metamfetamíns.

Meðan á ökuferðinni stóð er David sagður hafa móðgað parið og fór svo að Joseph stöðvaði bifreiðina og sagði að hún væri biluð. Hann bað David um að líta undir húddið og þegar hann gerði það sló Joseph hann í hnakkann og stakk hann margsinnis. Í kjölfarið notaði hann sveðju til að gera hann höfðinu styttri. Líkið skyldi hann eftir í skóglendi skammt frá.

David hefur nú verið ákærður fyrir morðið og á hann yfir höfði sér 40 ára fangelsi. Kærasta hans hefur einnig verið ákærð fyrir að hafa verið með í ráðum. Hún á einnig yfir höfði sér þungan fangelsisdóm.