David Mulholland, tuttugu og fimm ára þakviðgerðamaður, hefur verið dæmdur í sex mánaða fangelsi eftir að mynd af heimskupörum hans birtist opinberlega.

Á myndinni, sem sést hér að ofan, stendur David ofan á stálgrind húss í miðborg Manchester. Ljóst má vera að illa hefði farið hefði David misst jafnvægið og hlaut hann einmitt dóminn fyrir að brjóta gegn ákvæðum laga um öryggi á vinnustöðum.

Það voru starfsmenn í húsi í næsta nágrenni sem tóku myndina þann 21. janúar síðastliðinn og sendu hana til Vinnueftirlitsins í Manchester. Þegar forsvarsmenn þess mættu á vettvang viðurkenndi David að hafa gengið ofan í grindinni án þess að nota til þess þar til gerðan öryggisbúnað.

Fyrir dómi sagðist David ekki hafa gert sér grein fyrir hættunni fyrr en hann sá myndina. Sagði hann að vinna við að klára húsið, sem í dag er hótel, hafi verið þremur vikum á eftir áætlun. Hann hafi því brugðið á það ráð að leita allra leiða til að ljúka vinnunni sem fyrst.

Dómari mat þær útskýringar ekki beinlínis til refsilækkunar og fór svo að hann var dæmdur í sex mánaða fangelsi. Dómurinn er þó skilorðsbundinn til átján mánaða og svo lengi David heldur sig á mottunni getur hann um frjálst höfuð strokið.