Útskriftarhátíð Listaháskóla Íslands hófst um síðustu helgi og stendur yfir fram í lok maí.
Um síðustu helgi opnaði útskriftarsýning meistaranema við LHÍ í Gerðarsafni í Kópavogi. Útskriftarsýning grunnnema við myndlistar-, hönnunar- og arkitektadeild verður opnuð í Hafnarhúsi Listasafns Reykjavíkur á laugardag, 23. apríl. Þar munu áttatíu nemendur sýna verk sem endurspegla nám, rannsóknir og listsköpun þeirra.
Tískusýning útskriftarnema í fatahönnun fer fram í Hafnarhúsinu fimmtudaginn 21. apríl klukkan 17.00.
Útskriftarsýning leikara, Við deyjum á mars, verður frumsýnd föstudaginn 22. apríl í Smiðjunni á Sölvhólsgötu. Útskriftarsýningar dansnema fara fram í Borgarleikhúsinu frá 16. til 20. maí og útskriftarsýningar sviðshöfunda 20. til 27. maí í Tjarnarbíói.
Útskriftartónleikar nemenda úr tónlistardeild fara fram víðs vegar um höfuðborgarsvæðið frá 17. apríl til 22. maí.
Hægt er að nálgast dagskrána á vefsíðu Listaháskólans eða í appinu: Listaháskóli Íslands, sem hægt er að hlaða niður í App Store og Google Play. Hátíðin er opin öllum og frítt er inn á alla útskriftarviðburði Listaháskólans.