Damon Albarn, söngvari, lagahöfundur og forsprakki hljómsveitanna Blur og Gorillaz, á stórafmæli í dag, en hann fagnar fimmtugsafmæli sínu.
Þann 24. ágúst 1996 var Albarn í einkaviðtali við DV þar sem hann sagðist ná sambandi við raunveruleikann á Íslandi sem honum tækist alls ekki í London. „Ég saknaði Íslands eftir að ég var farinn til Bretlands og hlakka auðvitað mikið til þess að koma aftur, annars væri ég ekki að koma,“ sagði Albarn, en viðtalið var tekið á heimili hans í London.
Svo vel líkaði Albarn við Ísland og íbúa landsins að hann keypti hlut í Kaffibarnum og einbýlishús að Bakkastöðum 109 í Reykjavík. Hugðist hann fullgera húsið fyrir ákveðna fjárhæð, en í fjarveru hans hækkaði reikningurinn um tugi milljóna. Stefndi Albarn verkfræðistofunni Hönnun og taldi hana hafa brugðist eftirlitsskyldu sinni. Sátt náðist í málinu, en er málið var til meðferðar fyrir dómi lögðu forsvarsmenn verkfræðistofunnar fram tillögu sem Albarn og lögmaður hans, Heimir Örn Herbertsson, sættust á. Efni hennar var trúnaðarmál.
