„Ég var að ganga niður Vegmúla og þessi maður kemur eftir Suðurlandsbrautinni í vesturátt. Hann tekur tilhlaup, sparkar í mig og strunsaði síðan burtu. Ég öskraði á hann: „Hvað er að þér?!“ Hann leit á mig eins og ég væri fáviti,“ segir Heiðrún Líf Reynisdóttir, sem varð fyrir fólskulegri líkamsárás í hádeginu í gær. Lögreglan gaf út tilkynningu um málið til fjölmiðla í gær. Skömmu eftir atvikið og ekki langt frá varð önnur kona fyrir líkamsárás en sjónarvottar voru að þeirri árás eins og kom fram í frétt DV í gær.
Heiðrún telur líklegt að sami maðurinn hafi verið að verki enda stefndi árásarmaðurinn í áttina að vettvangi hinnar árásarinnar eftir að hann hafði sparkað í Heiðrúnu. Lögreglan handtók mann vegna málsins í gær og gat hún gefið lögreglu góða lýsingu á honum:
„Hann hefur líklega verið á milli fertugs og fimmtugs. Hann var sköllóttur með beint nef, í ljósbrúnum skinnjakka. Hann var í hvítum skóm og einhvers konar fótboltatreyju. Þessi lýsing passar við lýsinguna á manninum sem lögreglan handtók í gær en hann segist ekkert kannast við þetta og neitar að vera sá seki.“
Maðurinn sagði ekkert við Heiðrúnu, reyndi ekki að ná taki á henni og reyndi ekki að ræna hana.
Heiðrún hefur ekki verið boðuð í sakbendingu vegna málsins en óskar að svo verði: „Ég vil mjög gjarnan bera kennsl á hann því ég myndi þekkja hann í sjón aftur.“
„Ég var bara á leiðinni úr skólanum“
Heiðrún vonast eftir því að vitni gefi sig fram en er samt ekki viss um að einhver hafi séð þetta. „Það eru runnar þarna í kring og svo var þetta rétt fyrir húshorn.“
Heiðrún segir ótrúlegt að verða fyrir tilefnislausri árás um miðjan dag í Reykjavík. „Ég var bara á leiðinni úr skólanum með skólatösku,“ segir hún en hún stundar nám í Fjölbrautaskólanum í Ármúla. Heiðrún er fædd árið 1998.
„Ég var í myndatöku áðan, ég er bólgin á fætinum og það er mjög óþægilegt að ganga,“ segir Heiðrún en telur andlegu eftirköstin af árásinni verða varanlegri:
„Ég þori ekki að vera ein á gangi næstu vikurnar,“ segir hún. Hún vonar innilega að maðurinn náist og hljóti dóm: „Ég vona innilega að þessi náungi fari bak við lás og slá. Svona maður á ekki að ganga laus.“
Þeir sem gætu gefið upplýsingar um árásina eru beðnir um að hafa samband við lögregluna í síma 444 1000, en upplýsingum má einnig koma á framfæri í tölvupósti á netfangið 0725@lrh.is eða í einkaskilaboðum á fésbókarsíðu Lögreglunnar á höfuðborgarsvæðinu.
