Laust fyrir miðnætti í gærkvöld var maður handtekinn í Hafnarfirði, grunaður um líkamsárás í heimahúsi. Áverkar voru á brotaþola en eru þeir taldir vera minniháttar. Hinn grunaði árásarmaður gistir nú fangageymslu vegna rannsóknar málsins.

Þetta kemur fram í dagbók lögreglunnar. Þar segir einnig frá eftirtöldu:

Um klukkan 23:30 var ökumaður handtekinn vegna gruns um ölvun við akstur. Ökumaður hafði ekið yfir grindverk og inn í garð á Snorrabraut. Ökumaður gistir nú fangageymslu vegna rannsóknar málins. Bíllinn var flutt með dráttarbifreið af vettvangi enda skemmd.

Um hálfþrjúleytið í nótt var maður handtekinn eftir að hafa neitað að fara að fyrirmælum lögreglu. Hann veittist að lögreglumönnum sem þurftu að beita varnarúða til að stöðva árás hans.

Klukkan fjögur í nótt var maður handtekinn í Breiðholti þar sem hann hafði gert sig heimakominn í stigahúsi og lagst þar til svefns. Maðurinn býr ekki í húsinu og gat ekki upplýst lögreglu um dvalarstað sinn. Gistir hann því fangageymslu.

Rétt fyrir klukkan fimm var maður handtekinn í miðbæ Reykjavíkur vegna gruns um dreifingu á fíkniefnum. Bíður hann yfirheyrslu.

Í heild var þetta róleg nótt að samkvæmt dagbókinni og aðeins 46 mál komu á borð lögrelgu. Í flestum tilfellum var um að ræða aðstoð vegna ölvunar eða deilna og slagsmála.