Í nýrri úttekt danska ríkislögreglustjóraembættisins kemur fram að skipulögð glæpasamtök hafi hönd í bagga með mörgum giftingum sem fram fara í Danmörku. Danmörk er vinsælt land til að ganga í hjónaband í og í sumum litlum sveitarfélögum skipta tekjur vegna þessa töluverðu máli enda þurfa verðandi hjón að gista og borða á meðan þau eru í landinu.
En eins og í mörgu öðru þá koma skipulögð glæpasamtök við sögu í þessum geira. Þau sjá um að útvega fólki fölsuð skjöl og jafnvel koma því til Danmerkur þar sem hjónavígslan fer síðan fram. Þetta gera glæpasamtökin ekki af manngæsku einni saman því peningar eru drifkrafturinn eins og í mörgu öðru. Verðandi hjón greiða fyrir þjónustuna en það að ganga í hjónaband í Danmörku getur auðveldað fólki að fá dvalarleyfi í öðru aðildarríki ESB.
Danska ríkisútvarpið segir að samkvæmt lögum þá séu málamyndarhjónabönd heimil í Danmörku en nú eru uppi sterkar raddir meðal stjórnmálamanna um að banna þau. Mai Mercado, ráðherra barna- og félagsmála, segir að Danmörk eigi ekki að vera eins og einhverjar bakdyr inn í ESB. Talsmaður jafnaðarmanna, Mattias Tesfaye, tekur undir þetta.
Hugmyndir ráðherrans og jafnaðarmanna ganga út á að setja á laggirnar sérfræðingahóp sem fari yfir nauðsynleg skjöl þegar fólk sækir um heimild til að ganga í hjónaband í Danmörku. Þetta muni eiga við þegar viðkomandi eru ekki danskir ríkisborgarar eða með varanlegt dvalarleyfi í Danmörku. sérfræðingahópurinn geti hafnað því að fólk fái að ganga í hjónaband ef hann metur það sem svo að um málamyndarhjónaband sé að ræða.
