Lögreglumenn í flugstöðvardeild lögreglunnar á Suðurnesjum handtóku í fyrrinótt karlmann sem var að koma með flugi frá Varsjá og færðu hann á lögreglustöð. Í fórum sínum hafði hann 50 íslensk níu mánaða strætókort að verðmæti ríflega þrem milljónum króna.
Þetta kemur fram í tilkynningu sem lögreglan sendi frá sér. Þar kemur fram að tollverðir hafi stöðvað manninn við komuna hingað. Leikur grunur á að kortin hafi verið fölsuð erlendis og ætluð til sölu hér á landi í ágóðaskyni. Lögregla haldlagði þau, svo og umslög sem þau fundust í og farsíma umrædds aðila.
Samkvæmt verðskrá Strætó er fullt verð á níu mánaða korti 63.900 krónur. Samkvæmt því hefði maðurinn, eða þeir sem stóðu að innflutningnum, getað fengið nærri 3,2 milljónir króna fyrir þau.
