Lögmaður Reynis Traustasonar, fyrrverandi ritstjóra DV og stjórnarformanns Stundarinnar, hefur sent Arnþrúði Karlsdóttur, útvarpsstjóra Útvarps Sögu, sáttatilboð vegna ummæla sem hún lét falla um Reyni þann 5. desember síðastliðinn.

Þetta kemur fram á vef Fréttablaðsins.

Greint var frá því þann 7. desember síðastliðinn að Reynir hygðist stefna Arnþrúði vegna ummælanna.

„Hvað heldurðu að hann hafi mörg mannslíf og fjölskylduhamingju á samviskunni, bæði frá því sem ritstjóri DV og ritstjóri Stundarinnar og þá stjórnarformaður Stundarinnar?,“ sagði Arnþrúður meðal annars í símatíma stöðvarinnar. Rétt er að taka fram að Reynir hefur aldrei verið ritstjóri Stundarinnar þó hann hafi komið víða við á löngum ferli í fjölmiðlum.

„Arnþrúður hefur sagt margt í gegnum tíðina en nú gekk hún of langt og þessum rakalausa atvinnurógi og ærumeiðingum verður mætt af fullri hörku,“ sagði Reynir við Fréttablaðið sem greindi fyrst frá málinu.

Reynir hefur boðið Arnþrúði að draga ummælin til baka, biðjast afsökunar og ljúka ærumeiðingarmáli sem Reynir mun ella höfða gegn henni, með greiðslu miskabóta að fjárhæð 700 þúsund krónur.

Að því er segir á vef Fréttablaðsins hefur Arnþrúður tækifæri til að draga ummælin til baka á Útvarpi Sögu og biðja Reyni afsökunar, opinberlega og skriflega. Takist ekki að ljúka málinu segir í bréfi lögmannsins að Reynir áskilji sér rétt til að fylgja málinu eftir fyrir dómstólum og krefjast hærri miskabóta.