Skömmu eftir miðnætti var óskað eftir aðstoð lögreglunnar að hóteli í hverfi 105. Þar hafði maður í hótunum við starfsfólk og var með hníf. Þetta var ekki í fyrsta sinn sem hann hefur í hótunum við starfsfólkið. Hann var handtekinn og vistaður í fangageymslu. Þegar starfsfólk hótelsins var að vísa öðrum manni út af því, fyrir að hafa verið að áreita starfsfólk, dró hann hníf upp úr vasa sínum. Hann var einnig handtekinn og vistaður í fangageymslu.

Á tíunda tímanum í gærkvöldi var maður, í annarlegu ástandi, handtekinn í verslun í miðborginni en hann hafði í hótunum við fólk þar. Hann var vistaður í fangageymslu.

Um klukkan tvö í nótt var lögreglan kvödd að hóteli í miðborginni vegna konu í annarlegu ástandi. Henni hafði verið vísað út úr afgreiðslu hótelsins vegna ástands hennar. Þetta var hún ósátt við og réðst á starfsmann og beit hann í fót þannig að úr blæddi. Konan var handtekin og vistuð í fangageymslu.

Um klukkan hálf sjö í gærkvöldi varð umferðaróhapp í Grafarvogi, enginn meiddist en annar ökumaðurinn er grunaður um ölvun við akstur.

Einn ökumaður var handtekinn í nótt grunaður um akstur undir áhrifum fíkniefna og vörslu fíkniefna.