Slagsmál brutust út í sumarbústaðahverfi við Egilsstaði í nótt og var allt tiltækt lið lögreglu á svæðinu kallað út. Var lögreglunni tilkynnt um hópslagsmál í sumarhúsabyggðinni á Einarsstöðum. Þetta kemur fram í frétt RÚV.

Að sögn lögreglu varð ósætti er menn fóru á milli bústaða en einhverjir komu óboðnir í bústað. Brutust út áflog og var um 20-30 manna þvaga við bústaðina er lögregla kom á vettvang, þó að ekki hafi þar allir tekið þátt í slagsmálunum. Tveir menn voru handteknir vegna málsins. Ráðist var á lögreglu er hún skakkaði leikinn og eiga hinir handteknu yfir höfði sér ákæru vegna þess.