Kattholt beinir þeim skilaboðum til fólks að gæludýr eru ekki jólagjöf sem hægt er að skila eða skipta ef viðkomandi líst ekki á gripinn. Kattahaldi fylgi mikil ábyrgð en kettir geta lifað í allt að 15 ár og stundum lengur.

Á facebooksíðu Kattholts segir að margir reyni að „skila“ kettlingum eftir áramót.

„Oft er það skyndiákvörðun að kettlingur er valinn sem jólagjöf. Það kemur oft þiggjanda á óvart að fá dýr og kemur í ljós að hann hafi ekki viljað dýr, sé ekki tilbúinn að annast það eða vill velja sinn eiginn kettling sjálfur.

Það er mikið annríki hjá fólki um jól og áramót og því er þetta oftast ekki heppilegur tími, nema það sé hreinlega búið að ákveða að taka að sér kött og er tilbúið að skuldbinda sig. Að fá sér kött er stór ákvörðun og þarf að hugsa til enda. Börn eiga ekki að bera ábyrgð á ketti á heimilinu,“

segir jafnframt í tilkynningunni og þá er fólki bent á að koma frekar í Kattholt eftir áramót og velja sér kött.

„Það er oft sagt að kötturinn velji sér eiganda og því er sú leið mun betri.“