Ágúst Torfi Hauksson, framkvæmdastjóri kjötvinnslufyrirtækisins Norðlenska á Akureyri, segir að ekki verði hægt að auka kaupmátt launþega í næstu kjarasamningum. Þetta segir hann í kjölfar þess að Starfsgreinasambandið hefur kynnt kröfugerð sína fyrir næstu kjarasamninga þar sem meðal annars verður gerð krafa um að lægstu laun hækki í 425.000 krónur við lok samningstímans og að almennar hækkanir verði krónutöluhækkanir.

Fréttablaðið skýrir frá þessu. Haft er eftir Ágústi að ekki sé raunhæft að fyrirtæki hans geti staðið undir mikilli viðbótaraukningu á kaupmætti launþega í næstu kjarasamningum. Ef það gerist verði afleiðingarnar hugsanlega ekki góðar fyrir samfélagið.

„Störf gæti tapast þar sem of dýrt verði að framleiða vörur hér. „Launakostnaður er mjög hár í okkar geira og launahlutfallið hjá fyrirtæki eins og okkar sem á í samkeppni við erlenda vöru hefur hækkað mjög mikið undanfarin ár. Nú er svo komið, og ég held það eigi við um mörg fyrirtæki, að samkeppnishæfnin hefur skerst mjög mikið og aukinn launakostnaður er stór þáttur í því sem hefur rýrt hana.“

Er haft eftir Ágústi sem segist vilja launþegum allt hið besta en hlutirnir þurfi að ganga upp:

„Fólk á að geta lifað mannsæmandi lífi af laununum sínum. Kaupmáttaraukningin hefur verið mjög mikil en að svo stöddu er ekki hægt að ganga lengra.“