„Ég er harðlínu hægrimaður. Nú horfi ég á ykkur Frosta og Mána og sé strax veikleika þar. Þið eruð báðir með undirhöku og í yfirþyngd sem þýðir það að hugsanlega verið þið veikari fyrr, sem þýðir það að skattborgarinn þarf að borga fyrir ykkur úr okkar sameiginlega sjóð.“
Svo hófst viðtal Viðars Guðjohnsen í Harmageddon í morgun en Viðar býður sig fram til að leiða lista Sjálfstæðisflokksins í fyrir borgarstjórnarkosningar í Reykjavík í vor. Hann sagðist sjá veikleika í augunum á þáttastjórnendum undir eins.
„Það er ábyrgð að vita hvað þú setur upp í munninn á þér, að þú sért ekki að skemma líkamann á kostnað skattborgara. Kári Stefánsson hefur komið hingað, eins og Drakúla í sjónvarpið, og sagt: „Við þurfum að ausa fé í heilbrigðiskerfið. Ausa, komið með meira!“ En lausnin er ekki að finna einhver ný lyf við undirhökum heldur það að breyta lífsstílnum. Ekki að stofna einhverjar stofnanir eða einhver kerfi eða fundarhöld til að leysa undirhökuvandamál eða of breiðar mjaðmir eða klessufeit fólk ,“ sagði Viðar í Harmageddon í morgun.
Viðar sagði að jafnaðarmenn væru illmenni sem vildu gera alla að aumingjum. „Það á að vera svo góður við alla og helst að ná í sjúklinga erlendis frá. Við vitum það að í skýlinu hérna niður í bæ það er orðið allt fullt af útlendum rónum. Þau þurfa ekkert að hugsa um hver borgar, þau kunna ekki á peninga. Það er skattborgarinn. Ryksugum af þeim sem er duglegur,“ sagði Viðar.
Viðar sagði að unga fólkið í dag sé ofdekrað og vafið í bómull. „Það liggur í skólum. Þetta er duldasta atvinnuleysið okkar, að láta fólk hanga skólum. Og hver á að borga skólagjöldin? Jú, skattborgarinn, sá duglegi,“ sagði Viðar.
Hann sagði að alltof margir grunnskólakennarar væru konur. „Það er lausn til á því, að hækka laun karlmanna. Þetta er markaðslögmál, við verðum að bjóða í þá. Þeir eru greinilega eftirsótt vara í grunnskólum. Við getum ekki látið konunnar ráða yfir öllu. Þetta er orðið vandamál, konunnar, femínisminn vill búa til stofnanir sem ala upp börnin. Ég segi ef þið getið ekki haft efni á því að eiga börn eða hafið ekki tíma, þá eigið þið bara ekki að vera að eiga börn. Því ég vil ekki borga fyrir annarra manna börn,“ sagði Viðar.
Viðar sagði að unga kynslóðin sé meira og minna aumingjar. „Ástand unga fólksins líkamlega og andlega orðið mjög slæmt. Þá fer ég að vitna í tölur, það eru að koma núna inn á Landspítalann, inn á þessar geðdeildir, ungt fólk í haugum af því það getur ekki látið símann sinn í friði. Það er engin ábyrgð á því hvernig það glápir á símann,“ sagði Viðar.
Hlusta má á viðtalið við Viðar hér.
