Héraðsdómur Reykjaness hefur dæmt 27 ára karlmann í átta mánaða skilorðsbundið fangelsi fyrir vörslu á fíkniefnum. Um var að ræða tæp 470 grömm af amfetamíni sem maðurinn geymdi fyrir einstakling sem skipulagt hafði smygl á efninu til Íslands. Umræddur skipuleggjandi var einnig ákærður vegna málsins en var ekki viðstaddur fyrirtöku þess.

Fram kemur í ákæru að skipuleggjandi smyglsins hafi skipulagt og fjármagnað innflutning á samtals 469,02 g af amfetamíni, ætluðu til söludreifingar í ágóðaskyni hér á landi. Fékk hann nafngreindan aðila til að flytja fíkniefnin hingað til lands frá Belgíu, en sá einstaklingur kom með fíkniefnin falin innvortis og innanklæða sem farþegi með flugi WOW Air frá London þann 18. september 2014.

Þriðji aðilinn, sá sem hlaut ofangreindan dóm varslaði síðan fíkniefnin fyrir skipuleggjandann  og framvísaði þeim til lögreglu er hún hafði afskipti af honum. Hann var því ákærður fyrir að hafa fíkniefnin í fórum sínum.

Maðurin játaði sök í málinu. Fyrir dómnum krafðist maðurinn vægastu refsing sem lög leyfa og að gæsluvarðhaldsvist sem hann sætti frá 26. september 2014 til 2. október sama ár yrði dregin frá refsingunni að fullri dagatölu, kæmi til fullnustu hennar.

Mál var þingfest 28. febrúar síðastliðinn og sótti maðurinn það þing en meðákærði, skipuleggjandinn, ekki. Málið var næst tekið fyrir 17. þess mánaðar og mætti skipuleggjandinn ekki. Var þá ákveðið að kljúfa hans þátt frá málinu.

Við ákvörðun refsingar var það talið manninum til málsbóta að hann hefði játað brotið og sýnt samvinnu við rannsókn málsins. Þá var litið til þess að hans hlutverk í málinu var það að geyma fíkniefnin tímabundið. Einnig var horft til þess að meðferð málsins dróst töluvert fyrir útgáfu ákæru.