Lítið sem ekkert hefur sést til sólarinnar á suð og vesturlandi og ekki er útlit fyrir að það batni. Meðlimir leikhópsins X eru meðal þeirra sem hafa fengið sig fullsadda á sólarleysinu og ætla að láta í sér heyra gagnvart veðurguðunum. Hópurinn hefur í þeim tilgangi hrundið af stað undirskriftasöfnun þar sem krafist er betra veðurs.
„Við höfum fengið okkur fullsödd af þessu skítaveðri sem vaðið hefur uppi á suður og vesturlandi! Við krefjumst þess að nú verði tekið á málunum í eitt skipti fyrir öll og yfirvöld beiti þeim brögðum sem til þarf til að auka sólarstundir og velsæld þegnanna á þessum svæðum,“
segir í yfirlýsingu hópsins en ljóst er meðlimum er mikið niðri fyrir. Það ætti að vera öllum ljóst að hópurinn sé með þessu að slá á létta strengi. En leikhópurinn er eins og flestir Íslendingar löngu búnir að gefast upp á tíðarfarinu á suðvesturhorni Íslands.
„Við teljum ástandið vera orðið brýnt og krefjumst þess að skýjunum verði sýnt hvar Davíð keypti ölið! Davíð er reyndar hættur að drekka þar sem aldrei viðrar til þess að fá sér einn kaldann!
Ef ekki verður látið að kröfum okkar væri ekki nema sanngjarnt að ríkið greiði flug til Egilsstaða þar sem nýr höfuðstaður Íslands rís í sólbjörtu austrinu. Við hvetjum stjórnvöld til aðgerða strax! Spursmálslaust!“
