Hæstiréttur í Brisbane í Ástralíu úrskurðaði á dögunum að ungri konu væri heimilt að notast við sæði úr látnum unnusta sínum til að eignast barn.

Ayla Cresswell og unnusti hennar heitinn, Joshua Davies voru búin að vera í sambandi í þrjú ár og höfðu í hyggja að gifta sig og eignast börn. Það reyndist henni því mikið áfall þegar Joshua tók sitt eigið líf í ágúst 2016.

Ayla vildi engu að síður uppfylla drauminn um að eignast fjölskyldu og ákvað því að notast við fryst sæði úr látnum unnusta sínum og eignast þannig börn með aðstoð tæknifrjóvgunar. Fyrir dómi kvaðst hún ætla að ala barnið upp ein með aðstoð fjölskyldu unnusta síns heitins.

Samkvæmt úrskurði dómsins er Ayla heimilt að notast við sæði Joshua en það veltur þó á samþykki viðkomandi frjósemisstofu hvort tæknifrjóvgunin verði gerð eða ekki.

Í samtali við Ten Daily í Ástralíu segir Bill Potts, fulltrúi Lögmannafélagsins í Queensland að dómsúrskurðurinn sé að mörgu leyti sögurlegur og gæti reynst fordæmisgefandi í framtíðinni. Ýmsar siðferðislegar spurningar kunni þó að vakna,  til að mynda hvort að barnið verði löglegur erfingi föðursins.