Tveir ungir drengir, Sölvi Reyr Magnússon og Tristan Marri Elmarsson, sönnuðu svo um munar að þeir deyja ekki ráðalausir. Vinirnir skelltu sér í sund í Laugardalslauginni á meðan móðir Tristans, Rakel Ósk Þórhallsdóttir, var að hjálpa systur sinni að flytja. Hún varð aðeins of sein að sækja drengina og þá gerðu þeir sér lítið fyrir og húkkuðu sér far heim á sjálfum forsetabílnum.

Guðni Th. Jóhannesson, forseti Íslands, hafði verið að afhenda verðlaun í sundmóti og var því staddur fyrir utan laugina. Tristan Marri gekk því upp að honum og bað um far sem forsetinn alþýðlegi tók vel í.

„Hann sonur minn Tristan Marri er ALGJÖRLEGA ófeiminn og mjög ræðinn drengur. Hann hringdi í mig fyrir korteri síðan og sagði: Mamma, þú þarft ekki að sækja mig í sund ég hitti Guðna forseta hér og sagði honum að þér seinkaði aðeins vegna þess að þú værir að hjálpa systir þinni að flytja og hvort hann gæti nokkuð keyrt mig og vin minn heim. Svo mamma þú þarft ekki að sækja mig ég kem á forsetabílnum heim eftir smá stund,“ segir Rakel Ósk í óborganlegri færslu á Facebook-síðu sinni.

Eðli málsins samkvæmt hélt Rakel að sonurinn væri að grínast en svo reyndist ekki vera. Skömmu síðar komu þeir Tristan og Sölvi heim að Sogavegi í bíl forsetans og voru foreldrarnir alveg dolfallnir.

Hægt er að sjá stutt myndband hér neðar í fréttinni þar sem vinirnir spjalla við Guðna forseta.