Eiríkur Fannar Traustason, fanginn sem úrskurðaður var látinn í gær, eftir að hafa fundist meðvitundarlaus í fangaklefa sínum á laugardag, gengst nú undir viðamikla skurðaðgerð þar sem líffæri hans eru fjarlægð. Þetta staðfestir bróðir mannsins í samtali við DV. Til stendur að gefa líffærin til fólks sem á líffærum þarf að halda.
Eiríkur Fannar fannst meðvitundarlaus í klefa sínum í laugardag og var fluttur, þungt haldinn, á gjörgæsludeild Sjúkrahússins á Akureyri. Hann var síðan úrskurðaður látinn í gær.
Guðmund Gíslason, forstöðumann fangelsisins á Akureyri, rekur ekki minni til að fangar í vistun í fangelsinu hafi áður svipt sig lífi. Hann vísar á lögregluna á Akureyri, sem fer með rannsókn málsins.
Gunnar Jóhannsson, lögreglufulltrúi hjá lögreglustjóranum á Norðurlandi, segir í samtali við DV að andlátið sé rannsakað eins og hvert annað dauðsfall. Enginn grunur sé um refisverða háttsemi. Spurður hvort litið sé svo á að eitthvað hafi farið úrskeiðis við vistunina segir Gunnar að svo sé ekki. „Þarna á sér stað sjálfsvíg.“
Gunnar segir að Eiríkur Fannar hafi verið í afpláununarfangelsi. Í því felist að hann hafi haft, eins og aðrir fangar, aðgang að eldhúsi, stofu og öðrum vistarverum, auk þess sem hann hafði aðgang að sér baðherbergi. Hann segir þó að atvikið hafi átt sér stað í fangaklefanum sjálfum. „Rannsóknin er langt komin og gengur bara vel.“
Íslendingar hafa verið meðlimir í sameiginlegum líffærabanka Norðurlanda, Scandiatransplant, frá árinu 1991. Það ár voru sett lög sem skilgreindu heiladauða og heimiluðu brottnám líffæra úr látnum til ígræðslu. Teymi frá Svíþjóð kemur til landsins þegar fjarlægja þarf líffæri, og framkvæmir aðgerðina.
