Lögreglan handtók einn mann við Ýmishúsið í hádeginu. Hálfgerð pattstaða hefur ríkt við húsið í morgun en Héraðsdómur Reykjavíkur úrskurðaði á dögunum að Menningarsetur múslima, sem haft hefur aðsetur í húsinu um langa hríð, skyldi borið út.
Í frétt RÚV kemur fram að maðurinn sem var handtekinn hafi veist að fulltrúa Stofnunar múslima, sem krafðist útburðarins, með steypustyrktarjárni. Var hann handtekinn í kjölfarið eins og meðfylgjandi myndir bera með sér.
Fulltrúar menningarsetursins reyndu að varna lásasmið, sem kallaður var að húsinu í morgun, aðgang að húsinu. Sýslumanni var síðar veittur aðgangur að húsinu og hefur fulltrúi Menningarsetursins rætt við lögreglu og fulltrúa sýslumanns.
