Helgi Hrafn Gunnarsson, þingmaður Pírata, ætlar að bjóða sig fram til Alþingis á næsta kjörtímabili en Helgi var fyrir skemmstu valinn stjórnmálamaður ársins af hlustendum Bylgjunnar og lesendum Vísis.

Niðurstaða könnunarinnar var kynnt í útvarpsþættinum Sprengisandi, á Bylgjunni í morgun. Þar sagði Helgi að hann muni að óbreyttu bjóða sig aftur fram til Alþingis.

Píratar hafa verið á mikilli siglingu síðustu misseri og hefur flokkur mælst stærsti stjórnmálaflokkur landsins í könnunum, með yfir 30 prósent fylgi.

Verði það niðurstaðan í næstu Alþingiskosningum munu Píratar fá 19 þingmenn. Helgi sagði í Sprengisandi að hann ætti von á því að fylgi Pírata myndi minnka en flokkurinn sé tilbúinn að mynda ríkisstjórn komi til þess.

„Við höfum samþykkt stefnu í okkar röðum hvað varðar myndun stjórnar á næsta kjörtímabili. Aðaláhersla á næsta kjörtímabili ef við fengjum stjórnarmyndunarumboð væri að koma á nýju stjórnarskránni, sem sagt frumvarpi stjórnlagaráðs, og halda þjóðaratkvæðagreiðslur um áframhaldandi viðræður við Evrópusambandið. Þetta er það sem við leggjum upp með.“

Flestir tölu Helga hafa verið besta stjórnmálamann ársins en hann hlaut um 22 prósent atkvæða. Á eftir honum kom Sigmund Davíð Gunnlaugsson, forsætisráðherra, og í þriðja sæti var Bjarni Benediktsson, fjármálaráðherra. Í fjórða sæti var svo Katrín Jakobsdóttir, þingmaður Vinstri grænna.