Þórdís Lóa Þórhallsdóttir var í síðustu viku kynnt sem oddviti Viðreisnar í Reykjavík í komandi sveitarstjórnarkosningum. Í félagatali Félags kvenna í atvinnulífi titlar hún sig sem fjárfesti, frumkvöðul og forstjóra. Nú síðast starfaði hún sem forstjóri ferðaþjónustufyrirtækisins Gray Line á Íslandi. Þá var hún um árabil forstjóri og einn af eigendum Pizza Hut á Íslandi og Finnlandi.

Þórdísi Lóu var hent beint út í djúpu laugina þegar hún mætti í viðtal hjá sjónvarpsmanninum Sindra Sindrasyni í beinni útsendingu í fréttum Stöðvar 2 strax eftir að listinn var kynntur. Sindri var afar ágengur í viðtalinu og kom það Þórdísi Lóu augljóslega í opna skjöldu. Öll viðtöl verða auðveld eftir þessa eldskírn.

Yngri systir Þórdísar Lóu er hin þjóðþekkta söngkona Hera Björk Þórhallsdóttir. Hera Björk var nýlega í forsíðuviðtali hjá tímaritinu MAN þar sem hún greindi frá því að hún væri í löggildingarnámi í fasteignasölu og hvernig að hún hefði tekið andlega og líkamlega heilsu sína í gegn.