Af hverju ekki?
Laun Eggerts Þórs Kristóferssonar, forstjóra N1, hækkuðu um eina milljón króna á mánuði. Er hann núna með 5,9 milljónir á mánuði. N1 er að stórum hluta í eigu lífeyrissjóða og dróst hagnaður félagsins saman um 1,4 milljarða á sama tíma og laun forstjórans voru hækkuð um milljón. Af því tilefni tók DV saman lista yfir fimm sem eiga líka skilið milljón í launahækkun.
Bjarkey Olsen Gunnarsdóttir
Bjarkey Olsen, þingflokksformaður Vinstri grænna, er með 1,5 milljónir á mánuði, þar af eru 180 þúsund krónur á mánuði frá Alþingi til að halda tvö heimili. Hún segir það ekki duga til að greiða af húsnæðisláninu.
Kjararáð
Kjararáð hefur sýnt ótrúlegan dugnað og myndugleika á undanförnum misserum við að hækka laun æðstu ráðamanna. Það er tími til kominn að endurgjalda greiðann.
Biskupinn
Virkir í athugasemdum ærast þegar biskupinn fær launahækkun, þeim má ekki bregðast. Hafa skal í huga að það er ekki persónan Agnes biskup sem fengi launahækkun, heldur bara biskupinn.
Lalli Johns
Lalli hefur aldrei verið efnaður og fékk aldrei milljónirnar sem honum voru dæmdar í Breiðavíkurmálinu. Nú er hann búinn að vera edrú í fjögur ár og er á góðum stað í lífinu.
Guðni forseti
Ef það er einhver sem á að fá milljón í launahækkun er það Guðni Th. Jóhannesson, forseti Íslands, hann gefur peninginn hvort eð er til góðgerðamála. Styðjum góð málefni, hækkum laun Guðna.