Guðmundur Guðmundsson, nýráðinn landsliðsþjálfari, karlalandsliðsins í handbolta mun ekki sitja auðum höndum hér á landi milli leikja hjá landsliðinu.
Guðmundur hefur nefnilega stofnað ferðaþjónustufyrirtæki ásamt vini sínum, en fyrirtækið mun hafa það hlutverk að lokka fleiri Dani til Íslands. Guðmundur hefur eins og kunnugt er náin tengsl við Danmörku eftir að hafa stýrt danska landsliðinu í nokkur ár með góðum árangri.
Guðmundur segir frá því í samtali við BT í Danmörku að verkefnið hafi verið í undirbúningi um nokkurt skeið, en fyrirtækið hafi hafið starfsemi í síðustu viku. Mun fyrirtækið einkum sjá um að skipuleggja ferðir fyrir hópa.
„Ég hef lengi verið áhugasamur um að skipuleggja ferðir fyrir Dani til Íslands. Ísland er dásamlegt land og ég hef ferðast um allt landið og þekki það því mjög vel,“ segir Guðmundur og bætir við að hann hafi gaman af því að fara í veiði- og gönguferðir.
„Ísland er mjög vinsæll áfangastaður fyrir ferðamenn núna og við höfum trú á því að margir Danir hefðu áhuga á að heimsækja landið.“
Búið er að opna vefsíðu, GoToIceland, sem áhugasamir geta heimsótt.
Guðmundur segir að handboltinn verði í forgangi, nú sem endranær, þó svo að hann hafi nú stofnað fyrirtæki. Guðmundur var ráðinn landsliðsþjálfari eftir vonbrigðin á Evrópumótinu í Króatíu í janúar og ljóst að það verður nóg að gera hjá honum á næstu misserum.