Síðastliðinn föstudag var óvenjuleg matvöruverslun opnuð  í Myrtle Beach Borg í Suður Karólínu.  Um er að ræða  eftirlíkingu af Kwik- E-Mart -kjörbúðinni sem kemur fyrir í sjónvarpsþáttunum sívinsælu um Simpson fjölskylduna.

Í verslun þessari er hægt að kaupa ýmis konar matvörur og drykki sem áhorfendur kannast við úr þáttunum, eins og „Buzz Cola“ gosdrykki, „Squishee“ ískrap, „Lard Lad“ kleinuhringi og „Flaming Moe“ orkudrykki. Þá er einnig hægt að versla þar ýmiskonar varning sem tengjast persónum þáttanna.

Um er að ræða fyrstu „alvöru“ Kwik-E-Mart búðina en í tengslum við frumsýningu The Simpsons Movie árið 2008 var nokkrum 7-Eleven verslunum í Bandaríkjunum breytt tímabundið í eftirlíkingu af búðinni. Minjagripaverslanir undir nafni Kwik E Mart  er einnig að finna í Hollywood og í Universal Studios skemmtigarðinum í Flórída en þar er fyrst og fremst hægt að versla minjagripi og ýmiskonar varning tengdan þáttunum.

Undanfarna daga hafa ánægðir viðskiptavinir tjáð sig á Twitter og birt ljósmyndir af því sem fyrir augu bar inni í versluninni.

Mark Cornell fer fyrir þróunarteyminu hjá SimEx-Iwerks afþreyingarfyrirtækinu sem stendur að baki opnuninni. Segir hann í samtali við WBTW að hugsað hafi verið út í hvert smáatriði við hönnun verslunarinnar. Þá segir hann segir staðsetningu verslunarinnar í Suður Karólínu vera afar hentuga.

„Milljónir manna koma hingað í frí á hverju ári og mig grunar að Hómer Simpson myndi koma hingað í frí. Hérna myndi hann vera á heimavelli.“

Ráðgert er að opna að minnsta kosti fjórar aðrar Kwik-E-Mart verslanir til viðbótar þegar fram líða stundir.