Í nýjustu útgáfu barnabókarinnar Ástarsaga úr fjöllunum hefur geirvarta tröllkonunnar Grýlu verið hulin. Á einni mynd mátti sjá Grýlu gefa á brjóst og sást geirvarta hennar glögglega. Nú er búið að ritskoða umrædda geirvörtu.
Hrafn Harðarson vakti athygli á þessu á Twitter. Flestir á Twitter eru á því máli að ritskoðunin sé af hinu slæma. „Jii hugsið ykkur ef lítil börn myndu sjá ber brjóst! Nei bíddu..,“ skrifar Ragnheiður Kristín.
Ástarsaga úr fjöllunum, ný og ritskoðuð útgáfa ? #1981vs2018 pic.twitter.com/ojQeQ10BPo
— Hrafn Hardarson (@HrafnHardarson) July 30, 2018
Baldvin Ósmann birtir mynd af blaðsíðunni úr bókinni frá árinu 2010. „Hér er 2010. Man sem barn að þessi mynd truflaði mig mjög mikið því að einn þeirra er að klípa bróður sinn í eyrað. Skepna,“ skrifar Baldvin. Máni Pétursson í Harmageddon tekur undir og segir: „Haha það truflaði mig líka alltaf.“ Andrés Jónsson almannatengill segir einfaldlega: „Glatað“.
Nútíminn greindi frá málinu fyrr í dag og hefur eftir Sigþrúði Gunnarsdóttur, ritstjóra Forlagsins bókabúð, að þetta hafi verið listræn ákvörðun teiknarans, Brian Pilkington, en hann teiknaði myndirnar upp á nýtt fyrir nýjustu útgáfuna. „Ef allar myndirnar í bókinni eru bornar saman má sjá að það er fjöldinn allur af smáum breytingum. Þetta eru allt nýjar myndir, Þetta eru hans listrænu ákvarðanir og við vorum ekkert að hafa eftirlit með því sérstaklega,” segir Sigþrúður í samtali við Nútímann.