Þeir eru klæddir sérsaumuðum jakkafötum frá Herragarðinum en það vakti eftirtekt blaðamanns DV Fókus hversu misvanir þeir eru því að gera flotta bindishnúta.
Vilhjálmur Vilhjálmsson, verslunarstjóri Herragarðins og ákafur knattspyrnuunnandi sem kennir mönnum að gera bindishnúta alla daga, segir skýringuna líklegast þá að þeir séu öllu vanari því að ganga um í íþróttafötum:
„Sjálfur hnýti ég frá mér bindinu þegar ég fer inn í heita flugvél en mér sýnist samt á myndinni að sumir þarna hefðu alveg mátt hnýta aðeins ofar,“ segir Vilhjálmur og bætir við að sér finnist þeir samt hrikalega flottir þrátt fyrir misjafna kunnáttu í hnútamálum.
Þetta er ekki í fyrsta sinn sem Herragarðurinn sér um að klæða kappana upp. Þegar landsliðið keppti á EM fyrir tveimur árum vakti klæðaburður þeirra mikla eftirtekt en þá voru þeir í sérsaumuðum jakkafötum frá versluninni.
„Lið Englands mætti þá í jakkafötum frá Marks og Spencer en Íslendingarnir komu í sérsaumuðum jakkafötum frá okkur og voru fyrir vikið valdir eitt best klædda liðið á mótinu,“ segir hann og leggur áherslu á að auðvitað skipti það miklu máli hvernig menn klæða sig á slíku stórmóti.
Það kemur kannski sumum á óvart en landsliðsmennirnir voru með í því að hanna þessi glæsilegu föt sem samanstanda af stökum jakka við stakar buxur.
„Þeir voru í jakkafötum síðast en núna völdu þeir að hafa þetta tvískipt. Svo voru þeir að sjálfssögðu með í að hanna fötin því við hefðum auðvitað aldrei látið neitt frá okkur nema þeir væru alveg sáttir.“
Fötin eru úr hágæða ítölskum efnum og að sögn Vilhjálms geta smekkvísir landsmenn líka fengið svona föt sérsaumuð á sig eftir málum og verðið er frá tæplega 70.000 krónum fyrir stakan jakka.
Örugglega alveg þess virði.
