Jóhann Ingi Hafþórsson, blaðamaður Morgunblaðsins skellti sér í ferð til Englands á dögunum. Þar fór hann á leik í neðri deildum Englands í knattspyrnu.

Pistill sem hann skrifaði í Morgunblaðið í dag vekur athygli en fólkið sem mætti á þann leik var að einhverju leyti að hugsa um eitthvað allt annað en leiknn

,,Undirritaður gerðist svo frægur að fara á leik Doncaster Rovers og Southend United í ensku C-deildinni fyrir tíu dögum síðan. Erindi Englandsferðarinnar var vissulega ekki að fara á hinn gullfallega Keepmoat-völl, en tækifærið var nýtt og úr varð hápunktur ferðarinnar,“ skrifar Jóhann í Morgunblaðið

Þegar liðið var á leikinn voru tvær stelpur farnar að slást í stúkunni.

,,Eftir aðeins örfáar mínútur var stemningin engu lík. Lætin voru mögnuð og stuðningsmenn Doncaster hinir skemmtilegustu. Ekki skemmdi fyrir að spilamennskan var óaðfinnanleg og gríðarlega sannfærandi 3:0 sigur „minna manna“ staðreynd. Ekki voru allir jafn hamingjusamir og ég þetta kvöld hins vegar. Um korteri fyrir leikslok tók ég eftir því að fólkið fyrir aftan mig var hætt að horfa á leikinn og farið að einbeita sér að einhverju sem var að gerast í stúkunni. Nokkrum mínútum síðar voru tvær táningsstelpur farnar að slást nokkuð harkalega.“

Jóhann furðaði sig á því að gæslan gerði ekkert í málinu og að leik loknum voru fleiri slagsmál sem Jóhann varð vitni.

,,Atvikið vakti mikla kátinu hjá stuðningsmönnum Doncaster, sem fóru að syngja um stelpurnar og var greinilega um algenga sjón að ræða í Doncaster. Gæslumennirnir hlógu sem hæst og voru lítið að skipta sér af. Eftir þetta atvik labbaði ég nokkuð ringlaður frá vellinum og upp á lestarstöð. Á þeirri leið urðu stór hópslagsmál á vegi mínum og hvert þrönga og dökka húsasundið á fætur öðru. Að lokum var ég himinlifandi að komast upp í lestina mína og á leið til Leeds. Ég mæli engu að síður eindregið með að skella sér til Doncaster í frí.“