Willum Þór Willumsson, efnilegur leikmaður Breiðabliks, er á leið til Hvíta-Rússlands.
Þetta staðfesti Breiðablik í kvöld en félagið gaf frá sér stutta tilkynningu á Facebook-síðu sinni.
Willum hefur undanfarið verið orðaður við nokkur félög en hann þykir mikið efni og spilaði stórt hlutverk hjá Blikum síðasta sumar.
Willum er fæddur árið 1998 en hann er að skrifa undir samning við BATE Borisov í Hvíta-Rússlandi.
BATE spilar reglulega í Evrópudeildinni og mætir til að mynda Arsenal í 32-liða úrslitum á fimmtudag.
Greint er frá að Willum muni halda út á næstu dögum og mun skoða aðstæður hjá félaginu.
