Kristinn Freyr Sigurðsson miðjumaður Vals útskrifaðist af spítala í gær eftir að hafa legið þar síðan 10 desember á síðasta ári. Miðjumaðurinn fer hins vegar aftur inn á spítala á morgun.

Valur samdi í gær við þá Gary Martin, Emil Lyng og Lasse Petry og koma þeir allir til með að styrkja hóp Vals verulega. Kristinn Freyr var mættur á fundinn.

„Ég lagðist hérna inn þann 10. desember, það átti að laga rifu sem var í liðþófanum og bólgur sem voru í sinum í hnénu. Ég var búinn að glíma við þessi meiðsli í eitt ár, það átti bara að laga þetta svo ég yrði klár í slaginn fyrir næsta tímabil. Ég fæ svo sýkingu og ástandið er bara óljóst,“ sagði Kristinn við 433.is á dögunum.

Meira:
Martröð Kristins Freys: Fór í litla aðgerð 10. desember en hefur legið á spítala síðan

Kristinn fer aftur undir hnífinn á miðvikudag þar sem reyna á að laga það sem fór úrskeiðis, hann á í vandræðum með að rétta úr hnénu sínu þessa stundina.

Kristinn gengur um með poka framan á sér og fær áfram sýklalyf í æð til að reyna að drepa sýkinguna sem hann fékk eftir fyrri aðgerðina.