Sigurður Egill Lárusson, kantmaður Vals og einn besti leikmaður liðsins síðustu ár er að jafna sig eftir aðgerð. Sigurður fór undir hnífinn í nóvember þar sem sagað var af hælbeini hans.
Sigurður hafði verið að glíma við þessi meiðsli um nokkurt skeið og var ákveðið að grípa í taumana.
Beinið í hælnum hafði stækkað og stækkað síðustu ár. Hann var með gat á hælnum öðru megin til að geta spilað fótbolta.
„Endurhæfingin gengur bara mjög vel. Ég fór í aðgerð fyrir sex vikum. Ég komst ekki lengur í skó og því þurfti að saga af beini í hælnum. Ég er byrjaður að hjóla og þetta gengur ágætlega. Ég gæti trúað því að ég verði orðinn góður eftir þrjár til fjórar vikur,“ sagði Sigurður við Morgunblaðið um málið.
Nokkuð er síðan að talið var að Sigurður þyrfti að fara undir hnífinn og hann ákvað að fara í aðgerð í nóvember.
„Ég var að velta því fyrir mér að fara í aðgerð fyrir síðasta Íslandsmót vegna þess að þetta hefur háð mér í eitt og hálft ár. Beinið hélt áfram að stækka og verkurinn jókst. Ég ákvað hins vegar að bíða með aðgerðina þar til eftir Íslandsmótið. Þetta var orðið nokkuð skrautlegt. Ég var nánast laus í skónum en fann samt fyrir verkjum. Beinið skildi eftir sig gat í hælnum á bæði takkaskónum og hlaupaskónum. Það var mikið gert grín að þessu og var orðið tímabært að gera eitthvað í málinu.“