Ragnheiður Ríkharðsdóttir er að íhuga að bjóða sig fram í formannskjöri KSÍ sem fer fram þann 9. febrúar næstkomandi.
Þetta staðfesti Ragnheiður á Facebook síðu sinni í kvöld en hún myndi þá bjóða sig fram gegn Guðna Bergssyni og Geir Þorsteinssyni.
Geir sem er heiðursformaður KSÍ, gaf það sjálfur út á dögunum að hann ætlaði að bjóða sig fram á ný en Guðni hefur verið formaður undanfarin tvö ár.
Ragnheiður er fyrrum alþingiskona en sonur henna er Ríkharður Daðason, fyrrum landsliðsmaður í knattspyrnu.
Ríkharð ættu flestir að þekkja en hann lék 44 landsleiki fyrir Ísland á sínum tíma og skoraði 14 mörk. Hann lék með liðum á borð við Stoke, Lillestrom og Viking í atvinnumennsku.
Faðir hennar er þá Ríkharður Jónsson en hann lék með íslenska landsliðinu frá 1947 til 1965. Hann skoraði 17 mörk í 33 leikjum. Eins og faðir sinn er Ragnheiður frá Akranesi.
,,Í ljósi þess að Geir Þorsteinsson ætlar að bjóða sig fram til formanns KSÍ á nýjan leik þá er ég að velta fyrir mér að gefa kost á mér líka,“ skrifaði Ragnheiður á Facebook.
,,Held að það gæti hleypt fjöri í kosninguna. Ég hef mikla stjórnunarreynslu sem og reynslu af félagsmálum, áhugamanneskja um fótbolta frá barnsaldri bæði sem dóttir og mamma, held að þessi reynsla mín gæti nýst í starfinu.“
Ragnheiður gæti því blandað sér í baráttuna en ársþing KSÍ fer fram 9. febrúar. Það er skylda að tilkynna framboð með tveggja vikna fyrirvara.