Íslenskir íþróttamenn í hæsta gæðaflokki fá ekki alltaf þá virðingu og hrós sem þeir eiga skilið.

Þetta segir Dagur Sigurðsson, landsliðsþjálfari Japan í handbolta en hann ræddi Aron Pálmarsson sem var frábær fyrir íslenska handboltalandsliðið í gær gegn Króötum.

Dagur nefnir aðra íþróttamenn eins og Ólaf Stefánsson og Eið Smára Guðjohnsen sem eru nú hættir.

Dagur vonar að fólk geri sér grein fyrir því hversu góðir íþróttamenn þetta eru en þeir eiga þó ekki alltaf toppleiki eins og fólk er að búast við.

,,Ég vona að menn geri sér grein fyrir því. Það er samt oft þannig, ég man eftir því með Óla Stef að menn voru hálf pirraðir út í hann nánast þar til hann hætti. Hann var aldrei nógu góður fyrir menn,„ sagði Dagur í samtali við Vísi.

,,Það sama með Eið Smára. Menn fá ekki það kredit sem þeir eiga skilið því þeir eru svo góðir og menn ætlast alltaf til aðeins meira.“

,,Ég held að það sé miklu skynsamlegra að bera þessa stráka saman við einhverja af svipuðum kaliber í stóru liðinum. Þeir eiga ekki alltaf toppleiki.“

,,Ef þú myndir skoða alla leiki með Króötum. Duvnjak er ekki alltaf frábær sko. Menn þurfa að vera rólegir með það, að ætlast til of mikils þar.“

,,Þessar týpur vilja líka fá mikla ábyrgð og vilja geta tekið af skarið. Nú er bara halda áfram og halda sjó og hvíla hann aðeins gegn okkur!“