Jóhann Berg Guðmundsson, leikmaður Burnley, var frábær í gær er liðið vann öruggan 4-0 sigur á Bournemouth.

Jói Berg skapaði mikið af færum fyrir Burnley í leiknum og lagði upp annað mark liðsins.

Danny Murphy, fyrrum landsliðsmaður Englands, hélt ekki vatni yfir okkar manni í gær og talaði frábærlega um hann eftir leik.

,,Jóhann Berg Guðmundsson var stjarnan í dag, Aaron Lennon spilaði líka mjög vel,“ sagði Murphy.

,,Við höfum séð Sean Dyche gera þetta áður að nota hægri fótar mann vinstra megin og vinstri fótar mann hægra megin.“

,,Bakverðir Bournemouth réðu ekkert við þá. Jóhann Berg er með frábæran vinstri fót og hann er á meðal þeirra bestu sem ég hef séð þegar kemur að fyrirgjöfum.“

,,Ég elska vængmann sem getur notað báðar lappir til að senda fyrir. Bakvörðurinn er þá í miklum vandræðum.“

,,Hann var frábær í dag og bakvörðurinn sem hann var að spila við var tekinn af velli í hálfleik vegna þess.“