Orri Sigurður Ómarsson var frábær með liði Vals í fyrra sem tryggði sér Íslandsmeistaratitilinn örugglega.
Orri var í kjölfarið keyptur til Sarpsborg í Noregi áður en hann var lánaður til HamKam þar sem hann fékk reglulega að spila.
Orri fékk tveggja vikna frí í Noregi á dögunum en hann kaus að koma til Íslands og æfði með Valsmönnum sem undirbúa sig nú fyrir leik gegn Rosenborg í kvöld.
,,Ég er hér í sumarfríi. Ég hef engan tíma til að vera í einhverju fríi þannig ég fékk að mæta hérna og æfa í þessar tvær vikur sem þeir kalla sumarfrí,“ sagði Orri.
,,Sólin hefur farið ágætlega í mig hérna. Ég fæ svo mikið af henni í Noregi, ég vissi alveg að ég væri ekki að koma hingað í eitthvað sólbað. Mér líður best í svona veðri.“
,,Strákarnir hafa ekki saknað mín neitt! Þeir eru á nákvæmlega sama stað og í fyrra, auðvitað er ég ánægður að þeim gangi vel og ég horfi á alla leiki.“