Það er nánast hægt að fullyrða að við íslenska þjóðin, eigum ótrúlegast landsliðsþjálfara sem hægt er að eiga.

Sama hvaða árangri hann nær og hversu mikil athyglin á honum verður, aldrei breytist hann.

Heimir stýrði íslenska landsliðinu á Heimsmeistaramótinu þar til á þriðjudag, þá féll liðið úr leik. Lang minnsta þjóð í sögu HM, magnað afrek.

Íslenska liðið kom svo heim til landsins á þriðjudag og í gær var Heimir mættur á æskuslóðirnar, Vestmannaeyjar.

Flestir af þeim þjálfurum sem hafa lokið keppni á HM vilja fá frí með fjölskyldu og vinum en ekki Heimir.

Hann var í dag mættur að dæma á Orkumótinu í Eyjum þar sem stjörnur framtíðarinnar eru að keppa á stóra sviðinu. Fyrir þeim er þetta sjálft Heimsmeistaramótið.

Heimir dæmdi hjá FH snemma í morgun og trúðu strákarnir varla hver væri mættur á flautuna. Um er að ræða sjálfboðastarf fyrir félagið hans, ÍBV.

Sjáðu myndina hér að neðan.