Kári Árnason, varnarmaður íslenska landsliðsins í knattspyrnu, segir að hann muni að óbreyttu spila í Pepsi-deildinni með Víkingi eftir að heimsmeistaramótinu í Rússlandi lýkur.
Þetta kom fram á blaðamannafundi landsliðsins í morgun en þar sátu Kári og Emil Hallfreðsson fyrir svörum. Kári er aldursforsetinn í hópnum, verður 36 ára á þessu ári, en hann samdi við Víking fyrir mótið eftir að hafa leikið erlendis í fjölmörg ár, nú síðast hjá Aberdeen í Skotlandi.
Á dögunum var Kári orðaður við lið í tyrknesku úrvalsdeildinni, nýliðana í BB Erzurumspor, en sjálfur kveðst hann lítið vita um þann orðróm. „Þið vitið jafn mikið og ég um það,“ sagði Kári. Kári átti frábæran leik gegn Argentínu og var hann orðaður við tyrkneska liðið í kjölfarið.
Hann sagði að honum liði vel í skrokknum þó aldurinn væri farinn að færast yfir. „Ég er stífur eftir erfiðan leik en ekkert meira en þegar ég var 25 ára.“