Hörður Snævar Jónsson skrifar frá Rússlandi:
Emil Hallfreðsson miðjumaður Íslands var eðlilega svekktur að vera settur á bekkinn gegn Nígeríu á föstudag.
Emil var ónotaður varamaður í leiknum eftir frábæran leik gegn Argentínu í fyrsta leik.
,,Það var auðvitað fúllt að vera á bekknum, það er alltaf fúllt. Hvar það er og hvenær, það var búið að ákveða þetta að fara í tvo framherja. Ég var klár í að koma inn ef það þurfti og klár í næsta leik af það þarf, það er enginn leikmaður hjá okkur of stór til að vera á bekknum,“ sagði Emil.
Heimir Hallgrímsson, þjálfari liðsins lét hann vita nokkrum dögum fyrir leik og Emil tók því.
,,Hann kom til mín og ræddi þetta, þetta var tveimur dögum fyrir leik. Útskýrði það fyrir mér, það var taktísk breyting. Það er ekkert við því að segja, maður þurfti að vea klár ef kallið kæmi. Þetta gengur og gerist í fótboltanum, þetta er spurning að vera klár þegar kallið kemur. Nýta tækifærin, þetta getur komið fyrir hvern sem er að vera á bekknum.“