Óhætt er að segja að vinsældir Rúriks Gíslasonar aukist dag frá degi. Eins og alþjóð veit hefur fylgjendum hans á Instagram fjölgað margfalt og eru þeir nú orðnir tæplega 600 þúsund.
Liðsfélagar Rúriks í landsliðinu hafa gaman af þessu og nota tækifærið til að skjóta örlítið á félaga sinn. Að öllu gríni slepptu hafa þeir þó sagt að þetta sé gaman fyrir Rúrik enda vinsældirnar lygilegar.
Frederik Schram, markvörður íslenska landsliðsins, sá sér leik á borð í gær og skrifaði athugasemd við nýjustu mynd Rúriks á Instagram. Þar bað Frederik Rúrik hreinlega um að giftast sér.
„Omg omg omg omg! Rurik you are so hot cant believe it. Will you marry me please? If not please answer my dm and follow me back. Rurik í love you so much i am crying and i miss you you are cute and your are handsome.“
Sagði Frederik að Rúrik væru svo heitur að hann tryði því varla og spurði hvort hann vildi giftast sér? Ef ekki, bað hann Rúrik vinsamlegast um að svara skilaboðum sínum og fylgja honum að minnsta kosti á Instagram.
Líklega hefur Frederik verið að gera létt grín að öllum þeim skilaboðum sem Rúrik hefur fengið á Instagram undanfarna daga. Virðist hann í sérstaklega miklum metum hjá stúlkum í Suður-Ameríku.