„Það eru alltaf sömu mennirnir sem eru með smá banter í liðinu. Hann fær alveg sinn skerf held ég frá mönnum,“ sagði Birkir Már Sævarsson, hægri bakvörður íslenska landsliðsins, um óvæntar vinsældir Rúriks Gíslasonar á Instagram.
Eins og alþjóð veit hafa nokkur hundruð þúsund manns bæst í fylgjendahóp Rúriks á Instagram eftir leikinn gegn Argentínu. Þegar þetta er skrifað eru fylgjendur hans rétt tæplega 500 þúsund en áður en að leiknum gegn Argentínu kom voru þeir um 30 þúsund. Þetta hefur að sjálfsögðu ekki farið framhjá strákunum okkar sem hafa nokkuð gaman af þessu.
Aðspurður hvernig Rúrik hafi tekið þessum óvæntu vinsældum sagði Birkir að hann væri jarðbundinn mjög eins og aðrir í hópnum.
„Það rignir ekki upp í nefið á neinum hérna. Hann er bara ánægður með þetta held ég og allir frekar sjokkeraðir á þessum fjölda.“