Len Isleifsson er nafn sem eflaust hringir ekki mörgum bjöllum hjá Íslendingum en staðreyndin er sú að þarna er á ferðinni einn dyggasti stuðningsmaður íslenska landsliðsins sem nú keppir á heimsmeistaramótinu í Rússlandi.
Len þessi er kominn af Vestur-Íslendingum, búsettur í Manitoba í Kanada og honum er mjög umhugað um uppruna sinn. Hann og faðir hans lögðust í rannsóknarvinnu fyrir heimsmeistaramótið og komust að því að þeir eru skyldir eiginlega öllum leikmönnum íslenska landsliðsins. Einhverjir munu þá benda á að öll séum við skyld að einhverju leyti, en stundum þarf að fara nokkra ættliði aftur til að finna tenginguna.
Í samtali við CBC í Kanada segist Len vera skyldur 22 af 23 leikmönnum og landsliðsþjálfaranum Heimi Hallgrímssyni. Hann er skyldur Gylfa Þór Sigurðssyni í fimmta ættlið, fyrirliðanum Aroni Einari í sjöunda ættlið og í áttunda ættlið er hann skyldur Herði Björgvini Magnússyni, Rúnari Alex Rúnarssyni og Frederik Schram svo dæmi séu tekin. Eini leikmaðurinn sem hann fann ekki tengingu við var miðjumaðurinn knái Ólafur Ingi Skúlason. Þetta eru kannski ekki merkileg tengsl fyrir okkur Íslendinga en fyrir Len skipta þau máli.
Len er stjórnmálamaður í Manitoba og spilaði hann sjálfur fótbolta á sínum yngri árum. „Ég spilaði fyrir 40 árum og hef kannski aldrei verið brjálaður stuðningsmaður sem missir sig gjörsamlega þegar liðinu hans gengur vel. En þegar maður fór að skoða fótboltann og uppruna sinn þá varð þetta meira og meira spennandi,“ segir Len.
Í umfjöllun CBC er farið yfir velgengni landsliðsins á undanförnum árum og reynt að svara þeirri spurningu hvernig svo fámenn þjóð getur náð jafn langt á stóra sviðinu og raun ber vitni.
Len er harður stuðningsmaður íslenska landsliðsins og eftir að liðið tryggði sér þátttökurétt í lokakeppni HM, eftir sigur á Kósóvó í fyrrahaust, las hann upp tilkynningu á þinginu í Manitoba og óskaði íslenska liðinu til hamingju. „Það voru þarna þingmenn sem vildu taka víkingaklappið í þingsalnum, en augljóslega gátum við það ekki.“
Í síðustu viku fékk hann landsliðstreyju að gjöf frá Þórði Bjarna Guðjónssyni, aðalræðismanni í Winnipeg og á meðfylgjandi mynd má sjá hann halda á gjöfinni. Í bakgrunni er síðan innrömmuð landsliðstreyja. Len segist stoltur af íslenska landsliðinu í fótbolta.
„Árangur þeirra sýnir að það er hægt að gera eitthvað stórkostlegt úr litlu, það skiptir engu máli hver þú ert, hvaðan þú ert eða hvar þú ert.“ Hann sendir íslensku strákunum baráttukveðjur og segir þeim að halda áfram á sömu braut:
„Haldið áfram að gera góða hluti. Þið hafið lagt hart að ykkur og gert okkur öll mjög stolt. Haldið áfram að gera ykkur besta. Vonandi farið þið frá Rússlandi með stóra titilinn og hver veit, kannski komum við til Íslands og fögnum saman?“
