Aron Einar Gunnarsson, fyrirliði íslenska landsliðsins, segir að síðustu fimm vikur hafi verið mikill rússíbani. Hann gekkst undir aðgerð fyrir skemmstu og um tíma var tvísýnt um það hvort hann myndi ná heimsmeistaramótinu. En Aron leiddi sína menn út á völl gegn Argentínu í gær og átti góðan leik þegar Ísland náði í jafntefli gegn þessu ógnarsterka liði.
Blaðamenn ræddu við hann á æfingu Íslands í Gelendzhik í morgun, en eftir leikinn í gær flaug íslenska liðið að Svartahafi þar sem það æfir meðan á dvölinni í Rússlandi stendur. Þegar Aron var spurður hvernig hefði verið að leiða liðið inn á völlinn í gær, sagði hann:
„Tilfinningarússíbani í rauninni, maður var búinn að bíða einhvernveginn eftir þessu mómenti. Það eru fimm vikur síðan ég fór í aðgerð. Ég veit ekki alveg hvernig ég á að lýsa þessu, hvernig var að ganga inn á völl loksins, ég var búinn að bíða eftir þessu mómenti lengi þannig að ég var bara hrikalega stoltur þegar ég labbaði inn á og tók mér smá tíma til að draga andann og upplifa þetta.“
Aron var svo beðinn um að gera upp síðustu fimm vikur og hvernig þær hefðu verið:
„Þú getur rétt ímyndað þér. Það var mikið svekkelsi á tímabili, sumir dagar voru betri en aðrir og suma daga hugsaði ég með mér að það væri ekki séns að ég væri að fara ná þessu. Það er það góða að hafa lent í svipuðum meiðslum, til dæmis með ökklann, hvernig ég kem til baka. Ég er orðinn vanur því þannig að ég gat höndlað það. Hnéð var mjög gott í gær. Þessar fimm vikur voru erfiðar en klárlega þess virði þegar ég kom inn á völlinn.“
Aðspurður hvort hann hafi efast um að hann næði mótinu sagðist hann eiga gott bakland sem hann væri þakklátur fyrir.
„Eins og ég er búinn að segja, Kristbjörg (Jónasdóttir, eiginkona hans) og fjölskyldan og allir sem hafa ýtt mér áfram eiga hrós skilið fyrir það. Þegar maður er í fótbolta, að bíða eftir svona mómenti að spila á HM, og vita ekki hvort maður nær því. Það getur verið erfitt upp á hausinn að gera. Það er alltaf gott að eiga góða að.“
Aron sagði að hann væri í góðu standi eftir leikinn í gær. Hann væri þó með harðsperrur og stífur í skrokknum en hnéð og ökklinn væru í góðu standi.
